اگر از چوب و سنگه دمبوره مو
خدایی شی قشنگه دمبوره مو
یگو را دل شی خوشه خوش می خوانه
گهی پلده شی تنگه دمبوره مو
سبک استه فقط یک چوب خشکه
ولی گپ شی گیرنگه دمبوره مو
چطور بوگه چه بوگه خوب خبره
سخنسنج و زرنگه دمبوره مو
بلند آواز بوده استه مومنه
صدای صلح و جنگه دمبوره مو
گهی از عشق و عاشقی می خوانه
ده وختش هم تفنگه دمبوره مو
ده عاشقی هنر و یا سیاست
قلم قاغذ و رنگه دمبوره مو
اگر اوری نباشه رای رفتو
تیاغِ پای لنگه دمبوره مو
عزیز بهرامی
غزل و دوبیتی هزارگی
بیان دیدگاه