عزیز بهرامی

یک دل ده جای عاشقی کم کم غدر غدر
یک دل ده پای عاشقی کم کم غدر غدر

دمبوره غیتی سُر موشه دلتنگی دور موشه
می‌یه هوای عاشقی کم کم غدر غدر
اورجی موشه ده خاو مه چه نوربند و نازنین
یک گصوبای عاشقی کم کم غدر غدر
مانده نموشه هر چه بوگه از دل و از عشق
دو آشنای عاشقی کم کم غدر غدر
یادای گینه، دل ره مونه تازه تر بسم
می‌زنه صلای عاشقی کم کم غدر غدر
هر کس موپرسه دل تو کجا یه موگوم که برد
یک دل‌ربای عاشقی کم کم غدر غدر
تو چیم ده رای عاشقی استی نیی بگو
ما چیم ده رای عاشقی کم کم غدر غدر
چیزی بگو که از تو شنیدو غدر خوبه
تویی صدای عاشقی کم کم غدر غدر

---

غدر: بسیار
موشه: می شود
میه: می آید
اورجی: به خواب دیدن
گصوبا: سحر: صبحدم
مانده: خسته
بوگه: بگوید
گینه: قدیمی
بسم: بازم
صلا: تعارف
موگوم: می گویم
چیم ده را: چشم به راه
نیی: نیستی

یک دل ده جای عاشقی کم کم غدر غدر